Овај пост, морам да признам, сум го спремала скоро една недела. Не дека ми требаше време за да соберам информации, туку од толку многу податоци требаше да одберам на шо ќе се задржам. На крај па за легенди ќе пишам, морам и да внимавам како и во кое светло ќе ги прикажам, оти тие за Маџермаале се она шо е Маријанти за Битола. Штета шо за амбасадори ги имаме најголемите пијаници. И, гордост или штета како сакаш сфати, е што ги има во голем број, од кој како најверни другари на шишето ќе ги издвојам Летка, Бранко, Миленко, Маската и се разбира Чукаро.
Летка
Летчето ни е најголемиот поборник за еднаквост на половите во сите сфери на животот. Не можам да речам дека е феминистка, оти ко ќе го слушнам тој збор, пред мене излегва слика на жена во некое нежно фустанче со заводливи женствени движења која насекаде шири позитивна енергија со која ги убедува останатите (мажите) дека жената е центарот на универзумот и ништо не се може без неа и дека заслужува да биде третирана исто како и мажот. А додека Летка се залага за жената да биде третирана како маж. Таа е далеку од нежни фустанчиња и женствени движења. Најголемиот дек од денот го поминва пред портата или во дворот, со цигарата в рака. Бидејќи, како шо реков, се бори за еднаквост, секогаш кога ќе и дојди до дружење оди во најблиското бифе кај шо се берат мажите и заедно со нив ги празни пивските шишиња. Да напоменам дека пие само ладно пиво. Енаш на грешка продавачот и дал топло пиво и за малце ќе се загушела. Живеј сама па поради то, единствена занимација преку денот му е радиото кое, доколку е во форма (а 90% од времето е), го пушта до крај и почнува да пеј... а то нејзиното пеење навистина убива....
Бранко
За разлика од Летка која има свое постојано живеалиште, Бранко целиот живот го има поминато под ведро небо. За него не можам да речам дека е Маџермаалец оти не исполнува ниту еден од двата основни критериуми. А то се да е роден тука или пак да живее на маџермаалска територија најмалку 10 години. Значи Бранко нема маџермаалско државјанство ама ние си го осеќаме како наш оти најголемиот дел од времето го поминува низ нашите улици, иако незнам дали некогаш е свесен за то. Накратко кажано Бранко е нашиот почесен државјанин кој, од финансиски причини, сеуште не го има добиено почесниот клуч на маалото. Се надевам дека во иднина и то ќе биди. Но и без тоа тој и така се осеќа како од секогаш да живеел овде. Сите му сме комшии, иако скоро на никој не му го знај името, како резултат од пиењето. Единствено ги познава Миленко, Маската и Чукаро. Тие се неговиот бенд. Многу се мали шансите да ги видите сите четворица заедно. Додуша заедно само на почетокот на “свирката“, а после нормално, ќе се искарат и секој ќе си го фати својот пат... до другиот ден. Некогаш се случва во нив да проработи она хуманото, човечното, и ај да речам тинејџерското, па да се договорат заедно да спијат... тука застанвам, незнам шо се случва понатаму.... не ни сакам да знам...
Проф. Др. Чукар
Ако некогаш му текни да доделват Нобелова награда за изржливост, вервајте не само шо дефинитивно ќе биди номиниран, туку е еден од посериозните кандидати и да ја добие. Зошто? Па види вака... веќе 20 години нема постојано живеалиште, преспива кај шо ќе му текни. Во напуштени куќи, во дворови, по ниви, кај некој комшија шо ќе се смилова и на крај со клоци ќе го избрка, а една зима, според многумина, ја поминал спиејќи во шахта. Минатата година ја имаше привилегијата да спие 3-4 дена во некоја куќа во која имало затоплување. Арно ама следниот ден се разболе, од топлото изгледа, па повторно му се врати на стариот живот. Најинтересно кај него е шо и покрај сиот тој тежок живот шо го има, никогаш не ја изгубил верата. Никогаш не се женел. Вели дека 12 години жена немал видено. Чоекот навистина е просветлен, а плус то работи само 6 дена во неделата, седмиот ден го поминува во молење за да му се помогни во работата. Рака на срце, многу и е посветен на професијата. Инаку по звање е доктор по пијанствени науки, а моментално работи на истражување поврзано со пијанството и фокусирањето на погледот. Човекот е свесен за тоа и со текот на времето сигурно ќе успее да измисли некоја формула која на идните генерации ќе им помогне полесно да се справуваат со родителите кои најчесто, токму по очите, откриват дали нивните деца се пијани. Засега целиот негов труд не има вродено со плод и сеуште од власта чека да му ја зголеми платата (социјалното) од 850 денари, која целата до денар ја користи за материјали поврзани со истражувањето. Морам и да напоменам и покрај сите квалитети шо ги поседува Чукаро, меѓу кои, за разлика од Бранко, памтењето на имињата на сите комшии без разлика колку е пијан, најмногу пленува со својот талент за пеење (наскоро и ќе го слушните).
Леле се заборајв со пишење... ви реков дека ова нема крај...

Posted by The Goddess on Sunday, August 07, 2005 at 7.8.05 | Permalink